Ne Iyeknawatilis Marcus ne ume ipal ne nawi yeknawatilis: yejemet ne ajamat intukay Matay, Marcus, Lukas wan Yojan. Ken ne sejseuk, yaja techilwia ken ne Yeshu, tay kichiwki, inak wan tamachtij, wan ken mikik. Marcus ne mas kutu ipal ne najnawi.
Marcus kipia 16 takutun. Shiamatachia Marcus tik Bible Gateway.
Miak inat ka ini ne yeknawatilis ne mutajkwiluj achtu, melka Matay witz achtu tik ne Yankwik Sentaketzat ken tikishmatit, wan inat ka ne tajkwiluanimet pal Matay wan Lukas kitztuyat ne Iyeknawatilis Marcus; yajika nemit miak kenhat tay tikitat tik ini yey amat, ne muilwiat ipanpa uni ne “yejyeknawatilis sinopticoj”.
Marcus te sujsul weyak, te taketza wey, semaya techilwia ken ijtuk wan tay inaket. Tik ini amat te ina ken nesik Yeshu. Ina ka yaja yajki itech Yojan ne Teulyujmaka mumaka ulyuj, muejekuj tik ne kojtan, wan yajki Galilaya tamachtia. Kwakuni ina ken yaja kinpajtij kukuyat, kinpalewij ne kipiat se nawal teyek wan tamachtij. Yeshu kinnutzki sejse pal yawit iwan ken mumachtianimet, wan nusan kintukaytij majtakti-ume pal kintitania wejka tamachtia wan tapajtia ken yajasan. Yeshu tanutza katka ishpan miak kikakit witzet, wan kinhilwia katka miak casoj pal kinmachtiat. Tik itechan te kinekit ika te kitat yek tay taketza, wan yajki uksejse techan tamachtia. Kichiwa sejse pal tishpuyawit ken “sijsignoj” wan pal muishmati ne tejkia. Sejse palejmet te kitasujtat ika inat ka yaja ina wan kichiwa sejse tay inte yejyek. Ne Yeshu ina ka nemi pal yawi Yerushalem, ne weytechan kan nemi ne wey teupan, ipanpa ne ilwit ipal Paskwaj, wan ina ka yawit kitzkiat wan kimiktiat, wan kwak panut yey tunal yawi muketza senpa. Ijkiuni muchiwa. Kiwikat ishpan ne tatuktianimet wan kichiwat juzgar, wan kituktiat mucruzpilua. Miki wan kitaliat ne mikini tik se shaput.
Tik ne tipan takutun, ne takutun 16, ina ka kwak mukwepket kan nemituya ne shaput ukse tunal, kiajsiket ka ne imikini te kanaj. Né nemik se takapiltzin tik ikwajkwach istak. Yaja kinhilwia ka Yeshu muketzki wan yajki Galilaya, kan ne yawit kinamikit senpa. Sejse pal ne majmanuscritoj pal sujsul ikman tamit ka né (iwan ne versiculoj 16:8). Melka uni, ne uksejse manuscritoj kitaliliat chiupiuk. Ikuni, ina ka Yeshu kwak muyulkwij wan muketzki, yajki tanutza iwan ne mumachtianimet, wan kinhilwij: “Shumet nujme ne taltikpak, shikinnajnawatikan muchi ne yeknawatilis.” Sejse inat ka ikman te nemituya uni tamilis ika sejse kitalijket neman. Nikan titamakat uni takutun ijtik clajclavej [[ijkiuni]].
Inat ka muita ka ini amat muchiwki kwak kichiwa chiupichin shiwit ka kiwilejket ne Wey Teupan tik Yerushalem, tik ne shiwit 70. Su ijiuni, sema nakat katka ankakeski chulet wan lamajtzin welit kielnamikit ne Yeshu kwak yultuk. Anka mutajkwiluj ika te kinekituyat kielkawat muchi tay ikman panutuk.
