Ne Iyeknawatilis Lukas ne yey ipal ne nawi yeknawatilis. Yaja ne sea weyak ipal ne najnawi. Ini amat nusan ina tay muchiwki kwak nesik Yeshu, tay kichiwki, tay tamachtij wan ken mikik wan muketzki senpa. Ini amat wan Matay wan Marcus muchi kenhat. Melka uni, nikan nemit sejse casoj ipal Yeshu ne te muajsit tik ne sejseuk.
Lukas kipia 24 takutun. Shiamatachia Lukas tik Bible Gateway.
Su tikitat ini yey yeknawatilis ne se itech ne se, tiawit tikitat ka melka muchi nemit tik Greciajtaketzalis (ken muchi ne Yankwik Sentaketzat), ne tajkwiluanimet te kenhat wan ne kichiwki Marcus tajkwilua katka sujsul kanawak. Te ijkiuni ne itajkwiluani ne Iyeknawatilis Lukas; ini amat anka chiupichin mas uij ika welik tajkwilua yektzin. Kwak mupatak ini amat, timuejekujket ma mumatit te kenhat tik Nawat nusan.
Muita ka ká ne kichiwki ne amat ipal Lukas nusan kitajkwiluj Tay Kichijket Ne Tijtitanijtuk (ne amat makwil ipal ne Yankwik Sentaketzat). Miak kimatit ka ne ujume kichiwat sanse amat tik ume takutun wey.
Kwak pewa, ina ka yaja se amat kan yawi ina muchi ken ijtuk ikman pal tikmatit ka tejkia tay tamachtiat ipanpa. Kitajkwilua uni ipal se takat itukay Teopilos; te tikmatit ká yaja. Pal pewa, ina ken ijtuk kwak nesket Yojan (ne Teulyujmaka) wan Yeshu Mawaltijtuk. Ne inan wan iteku nemituyat tik Galilaya, tik se techan itukay Nazaret, wan yajket ka Yudaya tik se techan itukay Bet-Lejem wan kwak nemituyat ka né nesik ne Yeshu. Mukwepket Nazaret. Kwak weyki Yeshu wan takata, yajki mumaka ulyuj itech Yojan tik ne apan Yarden. Tipan yajki ne kojtan wan ne Tamintuk kinekik kiejekua wan te welik kishijshikua.
Yeshu mukwepki ka Galilaya tamachtia wan tapajtia. Tik Nazaret, itechan, te kitasujtat; yajki ukse techan itukay Kaparnajum. Ne amat techilwia miak tay yaja tamachtij wan ken kinpajtij ne kukuyat wan ne nawalpiat. Miak ajsit kikakit wan kinhilwia miak casoj. Kichiwa sejse pal muishmati, wan kinnutza sejse mumachtiani wan kintuktia pashaluat wejka tamachtiat wan tapajtiat. Ne Parishayujmet te kitasujtat wan kinekit kitzkiat.
Yeshu ina ka yawi Yerushalem wan ne imumachtianimet yawit iwan. Ajsit ka né wan kalakit tik ne weytechan. Yaja tamachtia itech ne Wey Teupan. Ne tatuktianimet yawit kitzkiat wan kiwikat tzaktuk. Kichiwat juzgar wan kimiktiat ijpak ne cruz. Muketza kwak miktuk wan munamiki iwan ne mumachtianimet wan kintuktia.
Tik ne ajachtu iswat ipal Lukas muajsit sejse takwikalis. Se yejemet ne itakwikalis Maryam ne inan Yeshu, pewa ijkini: “Nualmaj ina ka wey Nuteku…” (ini takwikalis munutza Magnificat tik Latin). Wan seuk ne itakwikalis Zakarya, ne iteku Yojan ne Teulyujmaka, wan pewa iwan ne pajpalabraj: “Tutajwan yektenejtuk, Teut pal Israel…” Tik ini tajtakwikalis nemit miak palabraj tay nusan muajsit ijtik ne Achtu Sentaketzat.
