Pawlo tajkwiluj Ne Tajkwilul Ipal Ne Tukniwan Ipal Galatia pal kinhajwa ne tekniwan tik ne sennemit pal Galatia. Galatia se takutun ipal “Asia” (kineki ina Turquia).
Galatia kipia chikwasen takutun. Shiamatachia tik Bible Gateway.
Achtu, miak Cristianoj Yudayujmet katka. Neman pejket muchiwat Crijcristianoj sejse ká te Yudayujmet, wan sejse tik ne sejsennemit mutajtaniliat katka ken ijtuk inwan. Sejse kimatit ka muchi ne Cristianojmet nemit pal kichiwat muchi tay ne Teut kintuktij ne Yudayujmet (ne tajtuli ipal Moshe); wan sejse kimatit ka te muneki. Kwak Pawlo kinhajkaw, ajsiket Galatia sejseuk tanajnawatiat se tanawatilis tekenha. Yajika Pawlo tajkwiluj Galatia, pal kinhajwa ika kinkaktiwit ne sejseuk.
Inte tikmatit ká ne “sejseuk” ne walajket tamachtiat tekenha, nian katiawel ne intamachtilis. Melka uni, miak inat ka anka yejemet Yudayujmet Cristianoj tamachtiat ka pal muchiwat Cristianojmet, munekit kichiwat tay ina ne itajtuli Moshe ma kichiwakan ne Yudayujmet: ka munekit muyawaltekit ne ukichket, sejse tay te welit tikchiwat tik ne Sewilis, wan sejseuk ijkiuni. Nusan inaket ka inte Pawlo ne tatuktia sute sejseuk tik Yerushalem. Pawlo kwalanik wan pal kinhilwitia ka yaja se yekkaya titanijtuk, ina ken yaja muyulpatak wan muchijki Cristianoj wan titanijtuk. Ina ka yaja tamachtia ne yekkaya yeknawatilis wan te kanaj seuk tejkia. Ini ne wey tajtanilis ipal ini amat: ne yajyankwik Cristianoj nakat itan ne itajtuli Moshe, o tea?
