Pawlo se titanijtuk ipal Yeshu, melka tinaskiat ka te kishmatki yultuk. Tikmatit ká yaja ika ne Tay Kichijket techilwia tay kichiwki. Yaja pashaluj yajki tik miak tal wan techan, wan nujme kinpalewia katka ne ajachtu Cristianoj kiketzat ne insejsennemit ipal se techan wan ukse techan. Kwak kiajkawa se sennemit wan yawi pashalua tik ukse techan, Pawlo kitajkwilua katka ajamat pal kintajtanilia ne tekniwan ken ijtuk iwan ne sennemit, wan nusan kinnawatia katka wan kinhilwia katka tay yek wan tay teyek ma kichiwakan. Ne Achtu Tajkwilul Ipal Ne Tukniwan Ipal Korinto se amat ijkiuni ne kituktij Pawlo itech ne sennemit ipal ne Cristianojmet ipal ne techan itukay Korinto, tik Grecia.
1 Korinto kipia 16 takutun. Shiamatachia tik Bible Gateway.
Mumati ka Pawlo nemituya tik se techan itukay Epesos (ashan tik Turquia) kan nusan nemik tekiti pal kinpalewia kichiwat ukse sennemit. Inat ka kitajkwiluj ini amat achtu ka ne tajkwilul ipal Roma, ika pejki nemi tik Epesos tik ne shiwit 53 wan kiajkaw tik ne shiwit 57.
Tikmatit ka Pawlo kituktia katka ajamat itech ne sennemit ipal Korinto seujseujti. Semaya tiwelit tikishmatit ne tajtajkwilul ne muanket tik ne Yankwik Sentaketzat. Pawlo kita ka sejse tik uni sennemit mushijshikuat wan te kikwit ne ujti yek, wan kitajkwiluj ini amat pal kinyektia wan kinhilwia katiawel ne ujti melawak. Nusan ina tay nemi pal tikchiwat kwak timunamiktiat.
Sejse tay inak tik ini tajkwilul muishmatit nujme, ken: “nimuchijki ipal ne te welit tatka ken se te weli tatka pal nikmakishtia ne te welit tatka. Nimuchijtuk muchi ipal muchi, pal nujme niweli nikpalewia sejse” (9:22), wan: “Wan melka nitaketza ipal Teut wan nikmati muchi n’ ijichtaka wan muchi ne taishmatilis, wan melka nikpia muchi ne tayulmatilis hasta weli nikulinia tejtepet, su te nikpia tetasujtalis, nian takta nupatiw!” (13:2), wan nusan: “Kwak nisulin katka, nitanutza ken se sulin, niyultaketza ken se sulin, nikishkejketza ken se sulin; kwak niweyki hasta nitakat, nikpuluj tay ipal ne sulin” (13:11). Ne tejkia: muchi ne takutun 13 ipal ini amat se yektzin takwikalis.
