Kenha ken Epesos, ashan sejse inat ka Pawlo inte ne yekkaya tajkwiluani ipal Ne Tajkwilul Ipal Ne Tukniwan Ipal Kolosay. Kolosay katka se techan ipal Turquia te wejka Epesos. Ne ajamat ipal Epesos wan Kolosay te sujsul tekenhat. Inat ka ini ajamat te kenhat ken ne iajamaw ne mutajkwilujket achtu, kwak Pawlo nemituya yultuk.
Kolosay kipia nawi takutun. Shiamatachia tik Bible Gateway.
Tik ne sennemit ipal Kolosay, melka ne tayulmatit kikwit Yeshu, nusan mutankwaketzat katka iishpan uksejse teujteutzitzin wan kipiatuyat ukse tamachtilis. Tejemet te tikishmatit uni tamachtilis nian uni teujteutzitzin, pero tikmatit ka ne tajkwiluani ipal ini amat inak ka te yek ma kipiakan: inak ka semaya nemi pal timutankwaketzat iishpan ne yekkaya Mawaltijtuk, ká ne Yeshu wan te seuk. Ina ka ne Mawaltijtuk nemi wan tatuktia ijpak muchi. Muchi ne taltikpak muchiwki ipanpa wan ka imaku. Ne Teut nemi ijtik yaja. Yaja tatuktia ijpak ne tanawatianimet wan nusan ijpak ne sennemit. Ijtik Teut wan takamet, sema nemi se, Yeshu Mawaltijtuk.
Nusan ina ka muchi tikenhat ipal Yeshu ika muchi sesan ijtik yaja: ne yajyawaltektuk ken ne te muyawaltektiwit, ne ijilpituk wan ne te kipiat itekuyu.
